БЕОҐРАД – Делеґация Националного совиту Руснацох и Заводу за културу войводянских Руснацох, на поволанку амбасадорох прешлого тижня, 30. януара, нащивела амбасади Русиї и України у Беоґраду.
У делеґациї спред Националного совиту Руснацох бул предсидатель Борислав Сакач и предсидатель Вивершного одбору НС Руснацох Ковач Желько, и предсидатель Управного одбору Заводу за културу войводянских Руснацох Миломир Шайтош. Представнїкох рускей заєднїци на окремней роботней схадзки у Амбасади Русийскей Федерациї сердечно привитал амбасадор його Екселенция Александер Боцан – Харченко, зоз дипломатским кором. На схадзки амбасадор представел велї можлїви конструктивни напрямки будуцого сотруднїцтва.
Того истого дня делеґация нащивела и Амбасаду України дзе нашу делеґацию привитали позарядови и ополномоцени амбасадор його Екселенция Олександр Александрович и треци секретар Дарина Гариб. З оглядом же сотруднїцтво зоз Україну иснує уж вецей децениї, було бешеди о тим цо потераз посцигнуте на общи хасен котри евидентни у нашей заєднїци,а розпатрени и дальши напрямки за сотруднїцтво.