НОВИ САД – Валянє будинку РТВ Войводини на Мишелуку, вибудов двох блокох Клїнїчного центру Войводини, потим нового будинку Заводу за наглу медицинску помоц Нового Саду, ушоренє кампусу новосадского Универзитету, реконструкция Булевару ошлєбодзеня, вибудов фабрики води – то дзепоєдни з проєктох на хторих Покраїнска влада и Город Нови Сад буду сотрудзовац, а цо и урядово дефиноване у Протоколу о сотруднїцтве АПВ и Городу Нови Сад.
Протокол початком того тижня подписали предсидатель Покраїнскей влади Иґор Мирович и городоначалнїк Нового Саду Милош Вучевич. Мирович з тей нагоди гварел же зєдинєни, зложни, з добрима планами и здруженима финансиями годни витвориц проєкти хтори превозиходза тоту ґенерацию, а як приклад наведол Мост шлєбоди, хтори вєдно будовали Город и Покраїна.
– Средства хтори буду обезпечени за тоти заєднїцки роботи будзе ше додзельовац спрам процедурох предвидзених зоз законом и правилами за додзельованє средствох -визначел Мирович.
Окрем горе спомнутих, заєднїцки проєкти буду и Сентандрейски булевар з мостом прейґ Беґелю ДТД, друга драга державней драги Iб шору у Футоґу и перша фаза вибудови державней драги IIа шору, од Нового Саду по Руменку.