Дзвери центру Блажена Йосафата отворени шицким

автор ол. живкович
587 Опатрене

РУСКИ КЕРЕСТУР – После Служби Божей и Молебену до блаженей Йосафати всоботу, 21. новембра, парох керестурски о. Михайло Малацко пошвецел просториї  Духовного центру Блажена Йосафата у присустве дзецох, волонтерох и вирних котри участвую у його роботи.

Як визначела одвичательна Центру, ш. Авґустина Илюк, велька символика же пошвецанє просторийох було праве на швето Воведения Пречистей Дїви Мариї. Як цо ше за ню отворели дзвери приблїжованя ґу Богу, так ше шицким вирним отвераю дзвери Центру.

Дзеци и їх фамелиї уж участвую у проєкту Нїтка любови у фамелиї, дзе родичи вєдно зоз дзецми вишиваю вельконоцни салветки з перлочками и на таки способ преноша традицию, културу и виру на шлїдуюци поколєня.

Центер потераз бул отворени вовторок и штварток до поладня од 9 по 11,30 годзин, а пополадню од 15 по 18,30 годзин. Як далєй будзе робиц увидзи ше после принєшених нових мирох за борбу процив коронавирусу.

ПОВЯЗАНИ ТЕКСТИ