КУЛА – Скупштина општини (СО) Кула вчера одлучела же Дзень општини Кула будзе 16. новембер – „Дзень ошлєбодзеня Кули од Австроугорского войска 1918. року”, як пише у Одлуки, а согласносц на тот предлог ище скорей дал Покраїнски секретарият за медзиреґионалне сотруднїцтво и локалну самоуправу Покраїнскей влади.
Предкладанє дала Комисия за утвердзованє назвох улїцох и одредзованє шветох Скуптшини општини после длугшей роботи, хтора закончена и з явну розправу од 23. октобра по 21. новембер прешлого року. Комисиї сцигли думаня з двох месних заєднїцох у Кули, од Окружного одбору Союзу войводянских Мадярох (СВМ), познєйше и з Дому култури Руски Керестур и три предлоги були же би ше за Дзень општини одредзело 8. май – Славу св. Марка, а єден за прилапени датум.
Як на схадзки СО Кула потолковал одборнїк и предсидатель Комисиї Александар Настич (ДСС), Комисия озбильно робела, предкладанє одмерйоване вецей як рок, же би ше за Дзень општини вибрало достоїнствени историйни датум, без идеолоґийних одреднїцох, як цо то бул дотерашнї – 20. октобер – Дзень ошлєбодзеня општини у Другей шветовей войни.
Як и Окружни одбор СВМ, з предложену Одлуку свойо нєскладанє и нєзадовольство виражели двоме одборнїки тей странки, хтори иншак у владаюцей коалициї у СО Кула. Одборнїк Кароль Валка ше опитал же „од кого то Кула ошлєбодзена, бо до теди то була єдна друга держава” и предложел же би ше тоту точку зняло з дньового шору, а у медзичаше предложело други датум хтори нїкого нє увредзує и будзе прилаплїви шицким гражданом општини. Тиж предкладал же би о датуму за Дзень општини свойо думанє дал и Совит за медзинационални одношеня Општини Кула.
У розправи поведзене же можебуц нєлапшно дате толкованє за спомнути датум, односно же вон ма ширше историйне значенє, насампредз у контексту познєйшого присоєдинєня Войводини ґу Сербиї.
Владаюца векшина з 20 гласами „за” вигласала же Дзень општини Кула будзе 16. новембер. При гласаню за тоту одлуку одборнїки СВМ напущели схадзку, а до скупштинскей сали ше врацели после гласаня.