КОЦУР – Дзень старих особох, 1. октобер, означени и у вербаским Ґеронтолоґийним центре – 30. септембра, вєдно з Дньом установи. З тей нагоди орґанизована културно-уметнїцка програма, на хторей присуствовал и предсидатель Општини Вербас Милан Ґлушац.
Присутних госцох привитала директорка Установи Радмила Мусич и упознала их з роботу Ґеронтолоґийного центру. Ґлушац роботнїком Центру повинчовал на успишней роботи у предходним периодзе, визначуюци же сотруднїцтво Установи и Општини будзе предлужене, пре подзвигованє квалитету защити старих, особох у стану социялней потреби и особох з инвалидитетом.
У рамикох програми представена и кнїжка „Драга без врацаня”, автора Драґу Кекича, хаснователя услугох Центру. Тиж представени подобово роботи истого автора, а у програми участвовали и госци з ансамблу „Дзивки Країни” и ґуслар Мирослав Драґнич.