Дзень школи на чесц Петрови Кузмякови

автор сен
1.2k Опатрене

РУСКИ КЕРЕСТУР – Основна и штредня школа з домом школярох „Петро Кузмяк” зоз шветочну програму у Велькей сали Дому култури Руски Керестур вчера означела свой дзень. Понеже ше того року наполнюю 200 роки од народзеня першого керестурского школованого учителя Петра Кузмяка, програма була пошвецена праве йому.

Як визначела директорка Школи Хелена Пашо Павлович, школски 2015/2016. рок за керестурских школярох и наставнїкох бул барз успишни, а дзепоєдни зоз звонканаставних активносцох школяре представели и на вчерайшей програми.

1-Skola-02

Програму отворел Дзецински хор „Шкорванчки”, а у музичней часци участвовали и Дзивоцка шпивацка ґрупа Дому култури з народнима шпиваками по руски и по сербски, та Себастиян Надь з поп-писню по анґлийски. Шпивацки точки порихтали Лидия Пашо и Юлиян Рамач Чамо.

Рецитаторе Ребека Семан, Матей Шепински и Валентина Новта того року посцигли значни успихи, та програма на Дзень школи було праве место за указованє їх роботи, як и їх менторкох Нади Колошняї и Ивани Дудаш. Школярка Марина Радоєвич тиж участвовала зоз составом з назву „Зоз доброту ше, можебуц, може виратовац швет”, першонаградзеним на тогорочней „културней” Домияди.

1-Skola-03

У танєчней часци наступели Штредня и Младша фолклорна ґрупа Дому култури Руски Керестур, хторих пририхтали хореоґрафе Ґабриєла Саянкович и Сашо Палєнкаш, а ритмични танєц школярох трецих и штвартих класох ОШ пририхтала Андреа Бучко. Школски рок бул успишни и за дзеци котри ходза до керестурского Оддзелєня ШОМО, а спред тей школи на клавиру наступала Ивана Планчак з композицию „Баркарола”.

Директорка Школи Хелена Пашо Павлович на академиї детально виложела участвованє школярох на змаганьох и успихи хтори витворели. Школяре висших класох ОШ освоєли значни места на општинских змаганьох з математики, физики, хемиї и физичного. Школа була и на Медзиокружним змаганю з руского язика, та окружних з биологиї и атлетики, а посцигнути и пласмани на Републичне змаганє зоз сербского язика. Найвекши резултати у тим школскин року то пласман Леонели Цифрич з Републичного змаганя „Цо знаш о транспорту” на Европске змаганє.

1-Skola-04

Штредньошколци тиж участвовали на општинских змаганьох з физики, историї и на спортских змаганьох у рукомету и кошарки, окружних з историї, а школяре напряму Туристични технїчар на факултету „Синґидунум” ришовали студиї случайох.

Медзи госцами на програми були народна посланїца Олена Папуґа, предсидателька Одбору за образованє Националного совиту (НС) Руснацох Мелания Римар, предсидатель Вивершного одбору НС Желько Ковач, предсидателька Скупштини општини Кула Снежана Мркаич, општински просвитни инспектор Зоран Ракич, предсидатель Совиту Месней заєднїци Руски Керестур Владимир Олеяр, керестурски парох о. Михайло Малацко, совитнїки у Школскей управи Зомбор, директоре школох, медзи нїма и з Коцура и Дюрдьова, домох школярох, та колектив школи.

1-Skola-05

ПОВЯЗАНИ ТЕКСТИ