ДЮРДЬОВ – Вчера у обидвох дюрдьовских образовних установох почало означованє Дзецинского тижня, з мотом „Бриґи нє водзиме, бавиц ше любиме!”. Програми, як цо то друженя, спортски активносци, преподаваня и друге, буду кажди дзень по пияток.
У дзецинскей заградки „Дюрдєвак” вчера була маскенбал. Дзеци ше з воспитачками прешпацирали до Основней школи „Йован Йованович Змай”, дзе их дочекали школяре нїзших класох з учительками, вєдно одшпивали даскельо шпиванки и послужели их з лакотками.
Нєшка у дзецинскей заградки буду спортски активносци, на ютре на 10 г. опрез будинка заградки (лєбо у просторийох КУД „Тарас Шевченко”, кед будзе подла хвиля) почнє Дзецински вашар, на хторим дзеци буду предавац свойо ручни роботи. На штварток буду патриц представу, а на пияток буду мац спортски дзень з родичами.
У ОШ Дзецински тидзень тиж почал з маскенбалом, а була орґанизована и „Калапияда”. Ґу тому, школяре мали и Тему дня – „Як дочекац госцох”, бо вчера, як горе спомнуте, у голу школи дочекали маскировани дзеци з дзецинскей заградки.
Нєшка школярски и парняцки школски тими буду писац поруки о своїх интересованьох, препоруки кїжкох, филмох и другим. На ютре буду патриц рисовни и други филми, на штварток будзе спортски дзень, а на пияток у висших класох ОШ школяре и наставнїки заменя улоги.