РУСКИ КЕРЕСТУР – Дзецинска драмска секция КУД „Тарас Шевченко” з Дюрдьова на Драмским мемориялє Петра Ризнича Дядї вчера участвовала з представу „Дурнїло”, хтору по мотивох приповедки Мирона Будинския и у драматизациї Якима Олеяра режирал Яким Чапко.
Мали ґлумци основношколского возросту досц розбавено и тримаюци повагу публики приказали Дурнїлову схопносц и мудросц, хтора ноши и красну поруку младим, актуалну за шицки часи – робота єден з найважнєйших сеґментох у нашим живоце.
У представи бавя Иван Хромиш, Борис Хромиш, Єлена Горняк, Владимир Горняк, Єлена Мудри, Єлена Михальовски, Мария Горняк, Иван Кухар, Иґор Салак и Иван Скубан.
Суфлерка Тамара Чордаш, костимоґраф Даря Хромиш, а ефекти пририхтала Ивана Цап.