Дзеци з наших местох на Мемориялє и у керестурскей Школи

автор маф
1.2k Опатрене

РУСКИ КЕРЕСТУР – Вчерайшу дзецинску представу Драмского студия АРТ рускокерестурского Дому култури „Васо Пикасо” на Драмским мемориялє Петра Ризнича Дядї провадзели и прейґ стоцецеро дзеци з наших местох котри маю  порядну наставу на руским язику, лєбо го виучую як виборни предмет, та и котри виучую нашу виронауку. Їх приход иницировал, орґанизовал и финансовал Одбор за образованє Националного совиту (НС) Руснацох.

До Керестура з тей нагоди пришли школяре и їх наставнїки з Дюрдьова на єдним,  а на другим автобусу з Коцура, Кули и Вербасу, а були и школяре з Бачкей Тополї и Нового Орахова.

По представи шицки нащивели домашню Школу „Петро Кузмяк”, дзе их привитала директорка Хелена Пашо Павлович, а домашнї школяре им пририхталу уметнїцку програму. Наступели рецитаторе, шпиваче, виведзени сучасни танєц, а музични точки на своїх инструментох виведли школяре котри источашнє ходза и до керестурского Оддзелєня Школи за основне музичне образованє з Кули.

За шицких госцох пририхтана и заєднїцка закуска у школскей єдальнї, а дзеци ше потим вєдно з домашнїма школярами дружели и бавели у школским дворе.

Предсидателька Одбору за образованє НС Мелания Римар з тей нагоди за Рутенпрес виявела же ше указує же тота инициятива и инвестиция, хтора почала прешлого року – оправдана и барз хасновита, понеже дзецом котри пришли до Керестура дава чувство националней припадносци.

– Жаль ми же нє пришли и дзеци зоз сримских местох и з Нового Саду, алє тоту акцию, хтору барз крашнє потримала и керестурска Школа, будземе плановац и нарок.

ПОВЯЗАНИ ТЕКСТИ