РУСКИ КЕРЕСТУР – Всоботу, 12. марца, млади зоз Драмского студия „АРТ” Дома култури у Руским Керестуре, отримали премиєру младежскей представи „Сезона лову на ловара”, українского автора Александра Витера, а у режиї Владимира Надя Ачима.
Представа на комични способ приказує динамични живот людзох зоз швета забави. Фоторепортерка, лєбо таковолани „папарацо“ (котру ґлуми Адриана Надь) пробує направиц ексклузивни фотоґрафиї познатого музичара, медзитим, такой наишла на препреченя. У хвильки кед єй идентитет и намира могли буц одкрити, одлучує ше прилапиц бависко и ґлумиц леґиня дзивки котра обачела же хтошка у єй квартелю. Бависко ю вше баржей уцаговало и вимагало же би бавела вецей улоги.
На концу ше указало же фоторепортерки змесцели жена музичней гвизди (Ребека Планчак) и його любовнїца (Тамара Будински), медзитим, вона обраца ситуацию на свой хасен и сцека.
Тема представи и виводзенє прилагодзени шицким возростом. Гоч єст вельо преобраценя ситуацийох, представа у физичним смислу надосц статична. Зоз ґлуму ше найбаржей визначела Адриана Надь, котра зоз своїм виводзеньом наисце нашмеяла публику.
У реализациї представи участвовали и суфлерки Валентина Тиркайла и Настася Надь, костимоґрафка Таня Орос, майстор шветла Желько Пашо, тон майстор Владимир Бесерминї и сценски роботнїк Дюра Хома.
