РУСКИ КЕРЕСТУР – Веб-сайт Радио-телевизиї Войводини (РТВ) вчера пренєсол реаґованє предсидателя Националного совиту Руснацох (НС) Славка Раца на прешлотижньову вияву и сообщенє предсидательки Националного совиту словацкей националней меншини Ани Томановей Макановей – же функционере СНС у Ковачици „з уценами, гроженями и прицисками” суґеровали членом того националного совиту же би подписали инициятиву за єй змену.
– Зявеня у Националним совиту Словацох указую на тото же ше политика директно миша до роботи националних совитох, процив чого ше мушиме шицки бориц, бо то нє добре – трима предсидатель НС Руснацох Славко Рац.
– Барз осудзуєм же ше тераз политика СНС директно уключела и помага опозицийному боку у Националним совиту Словацох. Думам же таки подїї можу барз начкодзиц, бо ше национална заєднїца подзелї, институциї ше почню гашиц и мож очековац лєм вше горши и горши обставини – гварел Рац.
На питанє чи таки зявеня можлїви и у других националних совитох, та и у НС Руснацох, Рац одвитовал:
– Можем повесц же очиглядне же план постої. Уж ше нагадує же шлїдуюци на шоре Македонци, а потим ше споминаю Руснаци. Значи, у шицких локалних самоуправох дзе нє на власци СНС, намага ше ю по кажду цену присподобиц ґу верху Републики, же би вони превжали шицки функциї котри постоя. Думам же то водзи ґу общому радикализму одношеньох у єдним демократским плурализме и обавам ше же як ше то закончи. Мушиме охабиц людзом же би сами одредзовали свою националну судьбу и политика ше нє шме мишац так очиглядно и так директно – гварел Славко Рац.
Як преноши РТВ, Рац ше наздава же нова амбасадорка Словацкей Републики у Беоґрадзе будзе реаґовац на зявенє у НС Словацох. Нажаль, як гварел, обава ше же нас, Руснацох, нє будзе хто охранїц и додал же отверанє прегваряцкого Поглавя 23 дава надїю же годно указац на факт же ше одредзени ствари потупює.