НОВИ САД – Посланїки Скупштини АП Войводини вчера почали схадзку на хторей главна точка дньового шору була Нарис одлуки о ребалансу покраїнского буджету. По предложеним ребалансу, буджет за 2016. рок 59,5 милиярди динари, цо за 1,72 милиярди вецей як предвидзене у децембру 2015. року.
Предсидатель Покраїнскей влади Иґор Мирович пред вчерайшу схадзку поручел же застановене нєнаменске трошенє з покраїнского буджету прейґ Фонду за нови технолоґиї, Управи за капитални укладаня и других таких поштреднїкох, та наявел же ше руши до вельких инвестицийох у проєктох хтори дотераз були занєдзбани.
– Наявели зме початок вибудови нового будинку РТВ Войводини, велї заєднїцки проєкти Управи за капитални укладаня и локалних самоуправох, вельки инвестициї до здравства, як цо то набавка трох анґио-салох – гварел Мирович.