„Дньовка” означела полнолїцтво

автор М. Зазуляк/Ц. Надь
1.1k Опатрене

[vc_column_text pb_margin_bottom=”no” pb_border_bottom=”no” width=”1/1″ el_position=”first last”]

У Руским Керестуре означена дводньова Мултимедиялна манифестация младих „Дньовка”, 18. по шоре, а отримана є 20. и 21. новембра у рамикох Костельниковей єшенї, у орґанизациї „Pact Ruthenorum”. 

У Билей („Дядьовей”) сали у Доме култури пияток, 20. новембра, представени музични албум „Лєм єден погляд” Златка Русковския зоз Руского Керестура, а тиж означена и 10-рочнїца младежскей радио-емисиї „Останьце нашмеяни” Радио Нового Саду (РНС). Всоботу, 21. новембра, у Велькей сали Дома култури отримана централна програма за младих „Дньовка”.

 СОБОТОВА ПРОГРАМА ПОЛНА ЗОЗ УМЕТНОСЦУ

На централней манифестациї, хтора отримана всоботу, наступали учашнїки зоз Руского Керестура, Коцура и Зомбора, а представели ше зоз танцом, поезию, музику и видео-записом. Манифестация почала зоз наступом Николини Шарич з Керестура, хтора першираз наступала на „Дньовки”, а тиж була и єдина хтора ше представела зоз танцом.

− Одтанцовала сом модерни танєц и задовольна сом зоз наступом. Любим танцовац и нє бануєм же сом участвовала – гварела Николина.

Музични точки було найвецей, млади музичаре ше представели зоз соло шпиваньом и зоз дуетами. Себастиян Надь одшпивал писню на анґлийским язику, а на ґитари го провадзела Марина Роман. Романова ше представела и зоз двома соло шпиванками, а одшпивала и дуети зоз Мирославом Малацком и Кристину Афич, шицки зоз Руского Керестура. Малацко и Афичова тиж мали соло точки, а шпивали анґлийски писнї. Ґрупа „Crazy Cousins” уж традицийно наступа на „Дньовки”, вше направя добру атмосферу и подзвигню розположенє. Иґор Горняк – Пишта, з Коцура, одреповал писню „Лєм дзеци”, зоз албума Pišta & Reepgun Open mind, хторим вишол у септембру того року як додаток часопису МАК.

− Задовольни сом зоз наступом. Нє знам кельо заступена така файта музики, алє приходза людзе, коментарую, видзи ми ше же послухали албум – толкує Пишта.

Того року було мало литератури. Зоз поезию ше представел лєм Саша Сабадош зоз Зомбора. По Сашовим думаню поезиї єст, а можеме ше лєм наздавац же ше млади одшмеля и же нарок будзе доминантнєйша.

Пущело ше видео-знїмок, на хторим була анкета о радио-емисиї „Останьце нашмеяни”, млади коментаровали емисию и роботу Двох Саньох, а тиж им и повинчовали ювилей емисиї. Санї публику здогадли и на конкурс за „Най Руснака/Рускиню”, а тиж поволали заинтересованих же би ше приявели на авдицию за нових водительох.

foto Maja (7)

„ДНЬОВКА” ОТВОРЕНА З ПРОМОЦИЯМИ И ТОРТУ

Била („Дядьова”) сала перши дзень „Дньовки” у Доме култури була полна з нащивителями и за тоту нагоду аж була и мала.

Як и на албуме, и на тим мини-концерту Златково композициї одшпивали Анамария Колошняї, Саня Полдруги и Танита Ходак, а провадзел их бенд формовани за тоту нагоду – сам автор, Златко Русковски, на бас ґитари, Владимир Медєши на ґитари, Сашо Палєнкаш на кахуну и Мирко Преґун на клавиятури.

Вони виведли шицки 12 забавни шпиванки по руски зоз спомнутого албума, хтори вишол з остатнїм числом часопису МАК, а вельочислена публика их потримовала и на концу наградзела з наисце енерґичним аплаузом. Шицки шпиванки на албуме „Лєм єден погляд” Златково авторски, гоч даєдни тексти написали и Сашо Палєнкаш, Саня Полдруги, Анамария Колошняї, Ксения Макаї Орос и Саманта Рац Стоїлькович.

Пред їх наступом означена и 10-рочнїца младежскей радио-емисиї „Останьце нашмеяни” РНС. Єй авторки и водительки Саня Маркович и Саня Полдруги, як и одвичательна редакторка Рубрики на руским язику Радия РТВ-а Златица Няради, през бешеду и фотоґрафиї представели нащивительом 10-рочну роботу у тей младежскей емисиї. Медзи иншим, Нярадийова з тей нагоди визначела же дзвери Радио Нового Саду отворени шицким младим.

Два Санї тоту їх першу промоцию вихасновали и же би поволали младих од 16 до 25 рокох же би ше приявели на авдицию за водительох спомнутей радио-емисиї, хтора будзе отримана 21. януара у Новим Садзе. Там будзе и їх остатня промоция, а пред тим нащивя и други нашо места. Як Два Санї наглашели, заинтересовани ше можу явиц и на їх Фейсбук профил. Треба же би були одвичательни и озбильни, порихтани учиц новинарску роботу, як и на тото же за початок робота будзе волонтерска, як цо перше робели и вони два.

Тоту дводньову Мултимедиялну манифестацию младих отворел Яким Винаї, предсидатель младежскей орґанизациї „Pact Ruthenorum”. По законченю програми, учашнїки, нащивителє и орґанизаторе полнолїтносц „Дньовки” преславели зоз коктелом и торту, а заинтересовани ше могли фотоґрафовац на промотивним банеру радио-емисиї „Останьце нашмеяни”, хтори бул поставени у голу Дома култури.

 

ВИСТАВА ФОТОҐРАФИЙОХ

Всоботу у голу Дома култури представена вистава фотоґрафийох з тогорочного конкурсу на тему „Контраст”. На конкурс сцигли 72 фотоґрафиї, од 17 авторох зоз Руского Керестура, Коцура, Нового Саду и Дюрдьова. За виставу орґанизаторе „Дньовки” вибрали 25 найлєпши фотоґрафиї. Фахови жири, у чиїм составе були Биляна Дудаш, Александра Медєши и Ана Костич, вибрал три найлєпши фотоґрафиї. На централней програми преглашени побиднїки − першу награду достала Милица Кнежевич зоз Керестура, другу награду Иван Киш зоз Дюрдьова, а трецу Мария Дорошки зоз Керестура. Побиднїки достали пенєжни награди.

Першу награду за найлєпшу фотоґрафию достала  Милица Кнежевич з Руского Керестура

Першу награду за найлєпшу фотоґрафию достала Милица Кнежевич з Руского Керестура

Окрем промотивного банеру емисиї „Останьце нашмеяни”, у голу Дома култури и Младежски часопис МАК мал свой штанд дзе були вискладани и понукнути прикладнїки, а тиж и додатки хтори виходза зоз нїм. Нащивителє могли поопатрац и вжац прикладнїк.

После програми млади ше предлужели дружиц у Дискотеки „Амадеус”, дзе музику пущали „Nation Deejays”. Роботу младих потримали и финансовали Завод за културу войводянских Руснацох, Национални совит Руснацох и Месна заєднїца Руски Керестур, а тиж помогли и Дом култури Руски Керестур, РНТ „Петро Ризнич Дядя” и НВУ „Руске слово”.

[/vc_column_text] [vc_column_text pb_margin_bottom=”no” pb_border_bottom=”no” width=”1/1″ el_position=”first last”]

УПЕЧАТКИ ПУБЛИКИ

Емилия Чизмар: Пачела ми ше тогорочна програма, думала сом же будзе повторени змист од прешлого року, алє тоти млади дзивчата ошвижели програму, а тиж зме видзели и нових учашнїкох. Окреме ми ше пачела Марина Роман.

Михаел Рамач: Одпровадзел сом и пияткову, и соботову програму. Пияток була интимнєйша атмосфера, шицко було на професийним уровню, албум успишни, и шицко випровадзела вельочислена публика. Треба и надалєй орґанизовац таки вечари.

Наташа Гайдук: Було барз интересантно. Промоция ЦД-а була успишна, а атмосфера приємна. На соботовей програми було вельо музики, цо ше мнє особнє пачело, а знова хибела поезия.

Борис Ройко: Як и каждого року, „Crazy Cousins” интересантни, знаю ше и нашалїц, добре шпиваю. Алє и нови учашнїки цо ше уключели були успишни.

Вецей фотоґрафиї єст на линку https://www.ruskeslovo.com/2015/11/11/23967/kosteljnikova-jesenj-2015/.

foto Maja (7)

[/vc_column_text]

ПОВЯЗАНИ ТЕКСТИ