РУСКИ КЕРЕСТУР – З нагоди тогорочней Мултимедиялней манифестациї младих „Дньовка” розписани конкурс за найлєпшу авторску фотоґрафию з тему „Бунт”,
Млади зоз Здруженя „Пакт Рутенорум” поволую шицких младих до 33 роки котри ше аматерски, лєбо професийно занїмаю з фотоґрафованьом, же би на ориґинални способ представели цо за нїх значи бунт, лєбо приказали процив чого ше треба побунїц.
Єдна особа може послац найвецей 5 фотоґрафиї, з особнима податками (мено, презвиско и место биваня) на е-адресу dnjovka.rk@gmail.com, найпознєйше по 1. новембер.
Як кажди рок, з фотоґрафийох хтори сцигню, 25 буду виробени и виложени у голу Дому култури Руски Керестур под час „Дньовки”. Фахови жири вибере три найлєпши фотоґрафиї, а їх авторе достаню пенєжни награди. Добитнїки наградох буду преглашени на главней програми „Дньовки”, чий датум будзе познєйше обявени.