НОВЕ ОРАХОВО – У Новим Орахове, у ОШ „18.октобер“, вчера, 12. децембра, у рамикох Манифестациї Днї Миколи М. Кочиша отримане литературне стретнуце з нашима рускима писателями.
За тоту нагоду школяре руского язика з ОШ „18. октобер” з Орахова и ОШ „Чаки Лайош“ з Бачкей Тополї своїм госцом и родичом, бабом и дїдом виведли програму з назву „Укажме цо учиме на годзинох руского язика“, а по програми друженє предлужене зоз стихами Мариї Дорошки, Любици Няради и Славка Папового з Руского Керестура. Мария Дорошки до школскей библиотеки у Орахове подаровала кнїжки руских писательох.
Стретнуце почало з привитнима словами директорки Школи „18. октобер” Жужани Шавелин Зелеи, наставнїци руского язика Сенки Бенчик и Ирини Папуґа, спред Дружтва за руски язик, литературу и културу, як орґанизатора Дньох Миколи М. Кочиша.
После литературного стретнуца госци нащивели Месну заєднїцу Нове Орахово, дзе их дочекала предсидателька Вивершного одбору Совиту Гайналка Шипош, а потим и Етно-хижу, як и улїцу Штефана Чакана.
Под час стретнуца з госцами бул и предсидатель Управного одбору КУД „Петро Кузмяк“ у Новим Орахове Владимир Маґоч.
Годзина руского язика пошвецена творчосци Миколи М. Кочиша нєшка на 12 годзин будзе у Кули, у ОШ „Петефи бриґада”.