Обовязки ґу держави ше муши плациц раз у мешацу, а кажде хто ше сце упущиц до „авантури” поднїмательства, муши буц порихтани на велї препреченя и одреканя же би витворел задумки.
У нашей держави уж длуго єст шивей економиї, зоз чим ше дружтво бори, алє то нє идзе лєгко. Так и у Коцуре, без огляду на пооштрованє контролованя и карох за поднїмательох хтори нє маю реґистроване подприємство, истих єст вельо, бо и нєзанятосц велька, та людзе пробую сами заробиц пенєж и на таки способ.
З помоцу держави, найшмелши ше одлучую реґистровац свойо подприємство, бо правда, теди велї ствари иду лєгчейше, алє им найчастейше после кратшого часу подприємство препаднє, прето же им обток звичайно мали же би закрил шицки трошки. Вец ше тоти поднїмателє ознова врацаю до шивей зони.
ПОЗИТИВНИ ПРИКЛАДИ
Заш лєм, у валалє єст и приклади позитивного дїлованя уж роками, без огляду на почежкосци. Таке и подприємство „Елмедо” Ивана Ґубаша, хторе ше занїма зоз сервисом апаратох за розхладзованє.
Иван почал тоту роботу ище кед закончел стредню школу, а подприємство исновало зоз претаргнуцами пре рижни причини. Медзитим, од 2007. року, тото подприємство Иванови основне жридло приходох и успишно дїлує у континуитету по нєшка.
– Подприємство сом реґистровал, бо сом сцел же би шицко було леґалне. Зоз тим сом достал и здравствене осиґуранє за себе, супругу и дзеци, достал сом можлївосц виписованя фактурох, а на чарно бим то нє могол, и плаценє би могло окончовац лєм у кешу. Цо найважнєйше, сиґурни сом же ме держава нє прешлїдзує, и нє будзем плациц нїяку кару, понеже поряднє виплацуєм обовязки – толкує Иван.
„Елмедо” подприємство специялизоване лєм за апарати за розхладзованє и построєня, цо нє значи же Иван нє ма роботи. Вон оправя хижни апарати, уградзує и оправя клими, хладзальнї, та вельки построєня за розхладзованє за месарнї, овоцарнї и други подобни роботи. Конкурентни є у околїску, алє нє прето же є єдини.
– Єст майстрох хтори робя исте тото цо и я, та аж и у валалє, алє я єден з ридких хтори реґистровани. Векши подприємства ме праве прето и анґажую, бо мам леґалну фирму, и прето же им можем виписац фактуру, та ми услугу виплаца прейґ рахунку – гвари Ґубаш.
Обовязки ґу держави муши виплациц раз мешачно, и ту углавним уключени порциї, доприноси и подобни трошки. Кнїжки нє водзи и порцию плаци паушално, цо вибрал кед ше реґистровал, а условиє за таки способ дїлованя то висина рочного обтоку.
БЕЗ РОБОТНОГО ЧАСУ
Обовязки хтори Иван муши виплациц досц вельки, а же би заробел и прейґ того и мал даяки профит од своєй роботи, Иван муши робиц без роботного часу. Ниа, ту и тот подли бок поднїмательства.
– Мушим робиц нисце вельо. Нє можем себе допущиц осемгодзинови роботни час, викенди и шлєбодни днї, бо ше то такой обачи на приходох. Меркуєм и же бим ше дакеди одпочинул, алє то наисце ридко. Мало сом и дома, вше сом даґдзе на терену, и барз ми жаль же нє мам часу анї за дзеци и супругу, анї за приватни живот, алє то цена хтору мушим плациц. Вше ше перше намагам заробиц за тото цо мам дац держави, а потим и же бим мал достойни приход – толкує Иван.
Праве му прето и ясне же прецо ше велї поднїмателє скорей одлуча робиц на чарно. Даваня хтори вон муши мешачно видвоїц за державу тоти особи затримаю за себе и маю векши приходи. Алє заш лєм, Иван задовольни зоз условиями у хторих роби и нє поносує ше.
Процес реґистрациї подприємства, як гварел, барз єдноставни и швидко ше закончи. Медзитим, кажде хто ше сце упущиц до „авантури” наволаней поднїмательство, муши буц порихтани на велї препреченя и одреканя, же би сцигол по верх пирамиди, дзе ше находзи тото прецо кажде и почина таку идею – профит.