РУСКИ КЕРЕСТУР – У наиходзацим периодзе Руска матка (РМ) будзе робиц на запровадзованю партнерства з Матицу сербску, пре обезпечованє средствох и сиґурносц у витворйованю своїх проєктох, гварене на вчерайшей схадзки Управного одбору (УО) РМ у Руским Керестуре.
Представителє РМ 4. фебруара у Бачким Петровцу буду мац роботну схадзку з представителями Матици сербскей, Бунєвскей матки и Матки словацкей, на хторей винєшу предкладаня за заєднїцки проєкти.
Члени УО РМ на вчерайшей схадзки розпатрали и предлоги проєктох хтори буду реализовац у тим року и з хторима буду конкуровац до Министерства култури и информованя, ресорних покраїнских секретариятох и до локалних самоуправох за доставанє средствох. Даєдни з проєктох то видаванє штирох числох глашнїка Матки „Руснак”, стретнуце поетох з Керестура и Коцура, отримованє Подобовей колониї у Коцре, а заплановане и видац збирку поезиї младих авторох у „Едициї Юлияна Надя”.
На схадзки порадзене же порядна Рочна скупштина Рускей матки будзе 27. фебруара у Шидзе, у просторийох КПД „Дюра Киш” на 14 годзин. На дньовим шоре буду звити о роботи у прешлим и планох роботи у 2016. року.