ШИД – З нагоди Дня ошлєбодзеня Шиду и Дня општини Шид вчера отримана Шветочна схадзка Скупштини општини и Шветочна академия, на хторей предсидатель Скупштини општини Шид Велимир Ранисавлєвич гварел же Шидянє означую 72 роки у шлєбоди, а за тоту шлєбоду спадли числени жертви и прето героє нїґда нє буду забути.
О числених жертвох и воєним стану под час окупациї, алє и одупераню фашизму, бешедовал директор Културно-образовного центру Шид Срдян Малешевич, котри наглашел же и нови поколєня муша знац за тоти историйни подїї и геройске одуперанє фашизму.
З тей шветочней нагоди додзелєнє и найвисше општинске припознанє – Награда „Шести децембер“, хтору достали режисер Цветин Аничич и Дома здравя „Шид“, а припознаня достали Здруженє женох „Єшень живота“, протоєрєй ставрофор хаджи Дьордє Воларевич, Водопривредне подприємство „Шидина“, ЯКП „Стандард“, Полицийна станїца Шид и Здравко Биєлич за посцигнути резултати на змаганьох у кик-боксу.
Додзелєни и окремни подзекованя за гуманосц, а достали их емисия „Хижа зоз шерца“, Комесарият за вибеженцох и миґрациї Сербиї и орґанизация Зєдинєних нацийох УНДП.
У уметнїцкей часци програми ґлумица Весна Станкович виведла монодраму „Милунка Савич“.
