БЕОҐРАД – Републична виберанкова комисия дотераз преглашела седем виберанково лїстини за виберанки посланїкох до Народней скупштини Сербиї, а на трох лїстинох кандидати и Руснаци.
На другей по шоре преглашеней лїстини Демократскей странки медзи кандидатами за народних посланїкох и Леона Виславки з Дюрдьова, пензионерка, дакедишня покраїнска посланїца. На штвартей по шоре преглашеней лїстини Сербскей радикалней странки кандидат и Дюрица Еделински, роботнїк зоз Шиду, а на седмей преглашеней лїстини Либерално-демократскей партиї, Лиґи социялдемократох Войводини и Социялдемократскей странки кандидатка и Олена Папуґа з Руского Керестура, професорка руского язика и литератури, дотерашня народна посланїца.
Олена Папуґа на лїстини на 9. месце, Леона Виславски на 88., а Дюрица Еделински на 130. месце.
За парламентарни виберанки на републичним уровню перша преглашена лїстина Сербскей напредней странки „Александар Вучич-Сербия победзує” (250 кандидати), друга „За праведну Сербию-Демократска странка (Нова, ДСГВ, ЗЗС)” (246 кандидати); треца преглашена лїстина „Ивица Дачич-Социялистична партия Сербиї (СПС), Єдинствена Сербия (ЄС)-Драґан Маркович Палма” (250 кандидати); штварта преглашена лїстина „Др Воїслав Шешель-Сербска радикална странка” (250 кандидати); пията преглашена лїстина „Двери-Демократска странка Сербиї-Сандра Рашкович Ивич-Бошко Обрадович” (240 кандидати); шеста преглашена лїстина „Союз войводянских Мадярох-Иштван Пастор”, а як седма по шоре преглашена лїстина „Борис Тадич, Чедомир Йованович-Союз за лєпшу Сербию-Либерално-демократска партия, Лиґа социялдемократох Войводини, Социялдемократска странка” (250 кандидати).
Термин за придаванє виберанкових лїстинох за републични виберанки по 8. април.