РУСКИ КЕРЕСТУР – Зубна амбуланта у рускокерестурскей Здравственей амбуланти нєодлуга знова почнє робиц, алє лєм раз до тижня, як будзе приходзиц стоматолоґ – дознава Рутенпрес од директора Дому здравя Кула др Жарка Шевина. Пошвидко будзе познате хтори дзень у тижню и у яким чаше будзе робиц зубар у Здравственей амбуланти.
Керестурска Зубна амбуланта нє роби уж єден час понеже дотерашнї зубар др Владимир Фа спорозумно, на його инициятиву и у рамикох законских предписаньох, преглашени за технолоґийни звишок.
По словох директора др Шевина, Дом здравя у медзичаше остал без ище двох стоматолоґох, та попри штверих дзецинских, вкупно робя штирме общи зубаре, котрих треба розподзелїц до седем населєних местох у кулскей општини.
Понеже за обезпечованє нових кадрох, а хибя и лїкаре других специялносцох, Дом здравя по нєшка нє достал согласносц з Министерства здравя, зубну здравствену защиту су примушени реґуловац на горе спомнути способ у амбулантох у Керестуре, Сивцу и Крущичу.