БЕОҐРАД/РУСКИ КЕРЕСТУР – На державним змаганю у каратеу, хторе отримане вчера, дзеци зоз Карате клубу „Русин“ ше змагали у борбох и катох и освоєли вєдно седем места – шейсц у поєдинєчней конкуренциї и єдно екипно.
Зоз териториї Войводини, Беоґрадского реґиону и Южней Сербиї на державним змаганю участвовали 75 клуби, односно коло 1 500 змагателє. Зоз керестурского карате-клубу участвовали шесцеро поєдинєчни змагателє и єдна екипа и шицки освоєли места.
Перше место у поєдинєчних борбох „надїї“ освоєла Сара Планчак, друге место Марина Надь, а треци места у истей катеґориї освоєли Анамария Няради, Мартина Рац и Андрей Дудаш. Треце место у борбох тиж освоєла Анастазия Фаркаш, у катеґориї пионирох.
Керестурки освоєли перше место у екипним змаганю у женскей катеґориї „надїї“, а екипу творели Сара Планчак, Марина Надь, Анамария Няради и Мартина Рац.
Каратистох за змаганє пририхтали тренере Михал Орос и Вероника Юрич, хтора була у судийскей орґанизациї.