РУСКИ КЕРЕСТУР – До керестурского Оддзелєня „Цицибан” Предшколскей установи „Бамби” з Кули за нови школски рок уписани 125-еро дзеци, з котрих 50 до полдньового, а 75 до цалодньового пребуваня. Числа уписаних до тих ґрупох подобни як и прешлого року.
Спомедзи 50 новоуписаних дзецох до полдньового пребуваня 41 дзецко будзе уключене до Пририхтуюцей предшколскей програми, а з нїма и 9-еро младши дзеци, цо до предшколскей програми буду ходзиц два роки.
До цалодньового пребуваня уписани 75-еро дзеци од єдного по 7 роки, котри буду розподзелєни до пейц возросних ґрупох – двох яшелькових и трох „обданїщових”.
У керестурским Оддзелєню ище вше єст шлєбодни места, та заинтересовани родичи можу уписац свойо дзецко.