НОВИ САД – Пондзелок 1. юния, з Нового Саду пошла перша, менша часц гуманитарней помоци до України, до Києва. Позберану помоц превожи Амбасада України у Републики Сербиї.
Зберанє гуманитарней помоци за интерно розселєни особи пре войну на востоку України порушала Инициятивна ґрупа гражданох руского и українского походзеня у Войводини, вєдно з Грекокатолїцку церкву и Амбасаду України у Сербиї.
Акция була скоро у шицких грекокатолїцких парохийох, а зберани насампредз шмати, ствари за особну гиґиєну и тирвацши поживово продукти.
Одволанє за зберанє помоци було вельке и акция оценєна як барз успишна, та ше назберану помоц з превозками Амбасади будзе вецей раз транспортовац до України.