Драмски мемориял будзе од 15. по 23. април

автор зам
1.4k Опатрене

РУСКИ КЕРЕСТУР – Тогорочни 48. Драмски мемориял Петра Ризнича Дядї у Руским Керестуре будзе од 15. по 23. април, а участвую єденац театрални представи – седем за старших и штири дзецински – утвердзене на вчерайшей схадзки Орґанизацийного одбору Мемориялу отриманей у рускокерестурским Доме култури.

З представами за старших участвую Руски народни театер „Петро Ризнич Дядя” (чийо два представи отворя и завру Мемориял), Драмски студи АРТ керестурского Дому култури, мултиязична представа у продукциї Заводу за културу войводянских Руснацох, потим Културни центер Кула, КУД „Яким Гарди” з Петровцох и РКЦ Нови Сад.

З представами за дзеци участвую КПД „ДОК” з Коцура, КУД „Тарас Шевченко” з Дюрдьова, Руске КУД „Др Гавриїл Костельник” з Кули и Драмски студио АРТ Дому култури Руски Керестур.

Як и прешлого року, дзецински представи орґанизовано буду патриц и школяре з наших местох дзе маме порядну, лєбо виборну наставу по руски, а їх приход орґанизує Одбор за образованє Националного совиту Руснацох. У Руским Керестуре школяре нащивя и Школу „Петро Кузмяк”.

Шицки представи буду у Велькей сали Дому култури – дзецински почню на 13, а вечарши на 20 годзин.

За тераз найнєпознатша финансийна часц тогорочного Мемориялу, понеже ище вше нє познате кельо ше средства достанє з републичного и покраїнского уровню. З буджету Општини Кула за Мемориял опредзелєни 150 000, а з Одбору за културу Националного совиту Руснацох 120 000 динари.

Понеже дотерашнї предсидатель Орґанизацийного одбору Мемориялу Владимир Надь Ачим дал задзекованє на тото место и на членство, за предсидателя Одбору вибрани о.д. директора Дому култури Йоаким Рац, а за члена, як представителька Заводу за културу войводянских Руснацох, Ґабриєла Саянкович.

1-Memorijal-02

ПОВЯЗАНИ ТЕКСТИ