РУСКИ КЕРЕСТУР – У Руским Керестуре нєшка на вечар почина 47. Драмски мемориял Петра Ризнича Дядї, а як наявене, тогорочну смотру театралней творчосци Руснацох на сцени у Велькей сали Дому култури на 20 годзин отвори подпредсидатель Покраїнскей влади и покраїнски секретар за привреду, обезпечованє роботи и ровноправносц полох Мирослав Васин.
Пред шветочним отвераньом, у голу Велькей сали Дому култури на 19,30 будзе отворана вистава маскох Милоша Лишанина Пифкия. После шветочного отвераня, перша представа на Мемориялє будзе „Береме ше – так нам и треба” Яна Лазорика, у режиї Силвестера Дорокхазия. Представу у копродукциї з коцурским КУД „Жатва” витворел Руски народни театер „Петро Ризнич Дядя”.
Орґанизатор Мемориялу Дом култури Руски Керестур, а по 25. април буду виведзени аж 13 театрални представи – осем за старших и шейсц дзецински, односно за дзеци.
Участвую ансамбли РНТ „Петро Ризнич Дядя”, Драмского студия „АРТ” керестурского Дому култури, КУД „Яким Гарди” з Петровцох, з Горватскей, Руского КУД „Др Гавриїл Костельник” з Кули, Руского културного центру Нови Сад, Театру „Ирена Колесар” зоз Сримскей Митровици, КПД „Дюра Киш” зоз Шиду, КУД „Тарас Шевченко” з Дюрдьова, Дому култури Сивец и госцох зоз Словацкей – професийного русинского Театру Александра Духновича з Пряшова.
ТАД двома представами – за дзеци и за старших – на соботу, 25. априла, завре тогорочни Мемориял.
Под час Мемориялу на вовторок, 21. априла на 17 г. у Хорскей сали Дому култури будзе отримани Округли стол з тему „Терашнї стан у театралней дїялносци Руснацох”.
Представи за дзеци на Мемориялє од пондзелку, 20. априла, починаю на 13, крем дзецинскей представи на вовторок, хтора будзе на 15 годзин. Вечарши представи починаю на 20 годзин.
Рутенпрес каждодньово будзе давац информациї з фестивалу, а од соботи на правим боку сайту будзе и окремна ґалерия фотоґрафийох з представох на Мемориялє.