РУСКИ КЕРЕСТУР – Тогорочни 48. Драмски мемориял Петра Ризнича Дядї вчера вечар на сцени у Велькей сали Дому култури шветочно отворели заменїк предсидателя Општини Кула Велибор Милоїчич, та бард нашого културного живота и театрални роботнїк Дюра Латяк.
У мено орґанизатора Драмского мемориялу визначних госцох и публику привитал директор Дому култури Йоаким Рац Мими и з тей нагоди подзековал Националному совиту Руснацох, а поготов Општини Кула, же финансийно оможлївели отримованє тогорочного драмского фестивалу.
Заменїк предсидателя Општини Кула Милоїчич наглашел же ше и руководительство и жителє оптини барз цеша и з Драмским мемориялом, як и з другима фестивалами Руснацох хтори ше отримує у Руским Керестуре, а надпомнул и же финансийна потримовка Дому култури и театралней дїялносци од Општини будзе и звекшана.
Отвераюци Мемориля, Дюра Лятяк наглашел же театер у живоце нас, тутейших Руснацох, вше мал вельке значенє. Здогаднул на театрални елементи у наших звичайох на Крачун, свадзбох и з других нагодох, та направел прегляд о нашей театралней уметносци у сучасним значеню того слова, о чиїх початкох нєт одвитуюци материялни шлїди, алє ше нагадує же вон и теди, як и познєйше у 19. и початком 20. вику, бул церковни и школски театер.
Латяк, котри и хронїчар и виглєдовач историї нашей театралней уметносци, дал и єй основни прегляд по снованє Мемриялу и нєшкайши днї.
– Драмски мемориял постал нєзаменлїва форма презентованя наших досцигнуцох на театралним полю. Най би и надалєй було так – заключел Дюра Латяк, преглашуюци же отворени 48. Драмски мемориял Петра Ризнича Дядї.