СЕРБИЯ – Предсидатель совиту Влади за унапредзенє положеня Ромох Ненад Иванишевич наявел же Сербия и идуци дзешец роки будзе участвовац у запровадзованю Декади инклузиї Ромох – медзинародней инициятиви за злєпшанє положеня тей националней заєднїци.
До Декади Ромох уключени дзевец держави у реґионє – Болгарска, Мадярска, Македония, Румуния, Словацка, Сербия, Горватска, Ческа и Чарна Гора, у хторих у нєвигодних економских и социялних условийох жиє векше число Ромох.
У Декади Ромох найбаржей ше роби на унапредзованю їх положеня у образованю, при обезпечованю роботи, у здравстве и у обезпечованю биваня. На прешлого тижня отриманим сходзе у Едукативним центре, Иванишевич гварел же резултати прешлей декади (2005-2015) значни по чишлє уписаних школярох и студентох, алє и у ришованю проблемох нєформалних ромских населєньох.
Тиж наявел же пошвидко будзе схадзка представительох Министерства будовательства о леґализованю нєформалних ромских населєньох, а на инициятиву Националного совиту Ромох. Представителє ромскей заєднїци винєшу свойо потреби у тей обласци, а Европска уния будзе анґажовац фаховцох и финансовац проєкти.