КОЦУР – Вчера, 21. марца у Основней школи „Братство єдинство” у Коцуре, у рамикох означованя 28. Дньох Миколи М. Кочиша, Дружтво за руски язик, литературу и културу по розписаним Литературно-подобовим конкурсу наградзело школярох чийо роботи фахови жири оценєл як найлєпши.
Спред Дружтва за руски язик, литературу и културу на тот завод пришли Ирина Папуґа и предсидатель Скупшини Дружтва др Юлиян Рамач, а школяре як награду достали кнїжку „Писнї и приповедки” Миколи М. Кочиша.
На Конкурс сцигли 167 роботи, од того 64 литературни и 103 подобово роботи, а школяре коцурскей школи послали и найвецей роботи на Конкурс – вкупно 60.
Од 167 послатих роботох наградзени 82 роботи, 33 литературни роботи и 49 подобово роботи.
Зоз коцурскей ОШ за литературни роботи наградзени 16-еро школяре, а за подобово роботи наградзени 11-еро школяре.
Подїя була преткана за рецитациями наградзених школярох, а професорка Снежана Шанта школяром пречитала кратки текст о поезиї з нагоди Шветового дня поезиї котри ше означує праве на вчерайши дзень, 21. марца.
Кнїжки од Дружтва на дарунок достали и 3 виховательки и 18 наставнїци руского язика котри послали роботи на конкурс.
