СУБОТИЦА – Предсидатель Вивершного одбору Националного совиту Руснацох Желько Ковач, предсидатель Дружтва Руснацох у Суботици Иван Гарди и предсидателька Управного одбору Дружтва Наташа Ґрунчич вчера нащивели городоначалнїка Суботици Єне Маґлаия, пре додзельованє нових просторийох Дружтву од локалней самоуправи и финансованє активносцох на рочним уровню.
Терашнї просториї, дзе и Подручна канцелария Националного совиту Руснацох, Дружтво може хасновац до конца 2016. року, понеже по Закону о реституциї, просториї 2013. врацени власнїкови, котри их такой предал новому власнїкови. Нови власнїк на истей адреси купел и други дїловни простор и уж там почал з будовательнима роботами.
Пре тоту причину условия за роботу у Дружтве очежани, сами просториї полни влаги, потребне билєнє и други роботи, хтори Дружтво у терашнєй ситуациї нє може окончиц.
Городоначалнїк Маґлаи виражел порозуменє за терашнї проблеми Дружтва, та понукнул пейц дїловни простори хтори би ше могло додзелїц Дружтву Руснацох, з хторих лєм єден у центре городу, дзе терашнї просториї.
Представителє Дружтва опатра понукнути просториї и винєшу свойо становиско. За дїловни простор понад 50 квадратни метери мешачно, без ПДВ, треба плациц кирию 5 000 динари.
Кед слово о финансованю активносцох Дружтва Руснацох у Суботици, и надалєй остава лєм можлївосц финансованя прейґ проєктох.