СУБОТИЦА – Вчера у Дружтве Руснацох у Суботици отримана порядна рочна Скупштина Дружтва, пред ню и схадзка Управного одбору, а на рочней схадзки окончени дзепоєдни кадрово пременки и спатрени терашнї стан пре вецей проблеми, хтори аж грожа и обстояню Дружтва.
Дотерашня подпредсидателька, пред тим и длугорочна предсидателька Дружтва Ксения Палатинус дала задзекованє на тоту функцию и на членство у руководительстве, и место нєй за подпредсидателя вибрани Иван Емейди, студент з Руского Керестура. Пре селїдбу зоз Суботици, задзекованє на членство у Управним одборе (УО) дала и Ґенка Яґодич, а место нєй до УО вибрани Любомир Папуґа, длугорочни предсидатель Орґанизациї глухонємих у Суботици.
У длугшим викладаню предсидатель Дружтва Иван Гарди и дотерашня подпредсидателька Ксения Палатинус винєсли терашнї проблематични стан у Дружтве Руснацох у Суботици, понеже локална самоуправа нє сполнєла обецунки о финансованю активносцох, цо уплївоавло на їх зменшанє, а проблем и висельованє з просторийох до других. Нови простор за тераз лєм обецани, а з терашнього ше Дружтво ма виселїц до конца идуцого року.
Винєшени и проблем нєдостаточного числа активних членох и малого нових, окреме младих, бо пришло до змени ґенерациї, та аж, перши раз од снованя 2003. року, поставене и питанє отриманя и дальшого постояня Дружтва Руснацох у Суботици.
Перше на схадзи УО, а потим и на Скупштини присуствовал и предсидатель Вивершного одбору Националного совиту (НС) Руснацох Желько Ковач, котри руководительство и членох поволал же би нашли моци зачувац Дружтво, а наглашел же НС на шицки способи потрима и поможе у ришованю проблемох.
После длугшей дискусиї заключенє же би ше роботу Дружтва пробовало зачувац, здумац програми интересантни младим, знова нащивиц городоначалнїка Суботици и инсистовац на материялней потримовки же би нє пришло до гашеня секцийох, алє и на цо швидшим обезпечованю нових просторийох.
Скупштина прилапела звит о роботи и активносцох у прешлим року, финансийни звит, звит Надпатраюцого одбору и план за 2015. рок, з наглешеньом же Дружтву потребна обща и материялна потримовка од наших институцийох, насампредз од НС Руснацох, а за обстоянє Секциї за предшколски дзеци и одвитуюца материялна потримовка од Одбору за образованє НС.
Попри участвованя на наших фестивалох и на СБ „Яша Баков”, на Скупштини поведзене же главна манифестация Дружтва Руснацох у Суботици – „Яр др Мафтея Виная” – будзе отримана 17. априла у Городскей читальнї.