РУСКИ КЕРЕСТУР – У провинцийним доме и манастире шестрох Служебнїцох у Руским Керестуре, од 19. по 21. юний були Духовни вежби за старших, хтори орґанизовали и водзели шестри.
Духовни преглїбйованя були на євангелски цитати „Так як цо Оцец любел мнє, так и я любел вас. Останьце у моєй любови”, (Йо 15,9), а на нїх участвовали коло 15 жени з Коцура, Вербасу, Кули и Керестура.
Попри катехезох, учашнїки робели и у менших ґрупох, черали духовни искуства, попри других, отримана и молитва Хресней драги, як и Служби Божо хтори служел парох керестурски о. Михайло Малацко.
Духовни вежби закончени зоз Службу Божу у Водици, хтора вчера там була з нагоди Школярского дня.