ДЮРДЬОВ – У просторийох Месней заєднїци Дюрдьов граждане вчера могли бешедовац зоз заменїцу Покраїнского омбудсмана задлужену за людски и меншински права Еву Вукашинович, котра после розгваркох за Рутенпрес виявела же у жабельскей општини загрожени меншински права.
Гоч тренд же ше национални меншини манєй жаля на повредзованє правох з корпусу меншинских правох, а баржей на повредзованє правох з общих обласцох пре чежшу економску ситуацию, як гварела Вукашиновичова, Дюрдьовчанє ше жалєли и на єдно и на друге.
Притужби було з обласци службеного (нє)хаснованя язика и писма националних меншинох, як и на їх нєсрозмирну заступеносци у явних институцийох. Як гварела Вукашиновичова, гражданє ше жалєли же у Општинскей управи Жабель нєт службенїкох котри комуникую на службеним меншинским язику, документи на тих язикох тиж нє доступни, а нє мож ше анї повинчац на язику меншини.
Дюрдьовчнє поднєсли даскельо зауваги на роботу явних општинских подприємствох и витворйованє меншинскх парвох у истих, алє и на роботу у обласцох хтори нє у компетенцї омбудсмана, но заш лєм достали правни совити и толкованя як можу ришиц винєшени проблеми.
После поєдинєчних розгваркох з Дюрдьовчанами, заменїца Омбусмана и сотруднїца за одношеня з явносцу и програми сотруднїцтва Покраїнского омбудсмана Анкица Драґин бешедовали з представителями Месней заєднїци а потим нащивели и Основну школу „Йован Йованович Змай”, дзе з директорку Марию Тртич бешедовали о проблемох у образованю, насампредз на меншинских язикох.
