Екскурзиї за школярох керестурскей Школи

автор маф
976 Опатрене

РУСКИ КЕРЕСТУР/БЕОҐРАД – Основана и штредня школа з Домом школярох „Петро Кузмяк” з Руского Керестура, пред законченьом першого полроча, витворела вецей путованя за своїх школярох – до Беоґраду, Суботици и Будапешту.

Шицки 50 школяре седмей класи Основней школи вчера нащивели Саям Науки у Беоґрадзе, цо сами финансовали. Тота нащива планована у Рочним планє Школи у рамикох професийней ориєнтациї школярох, за хтору ше пририхтую у шлїдуюцим школским року.

Штредньошколци з Дому школярох 15. децембра були на єднодньовей образовно-едукативней екскурзиї у Беоґрадзе, хтору предводзела директорка Хелена Пашо Павлович зоз сотруднїками. Школяре нащивели Музей воздухоплївства, храм св. Сави, у Театру „Мадлениянум” патрели представу „Ана Каренїна”, а мали и обиход городу. Екскурзия за школярох була безплатна, понеже ю на свою инициятиву финансовал Покраїнски секретарият за образованє, управу, предписаня и национални меншини-заєднїци зоз 102 500 динари.

З нагоди наиходзацих крачунских и новорочних шветох, Туристични напрям Школи 10. децембра орґанизовал путованє до главного городу Мадярскей – Будапешту, дзе попри саймох, нащивени и дзепоєдни знаменїтосци того городу.

Тиж прешлого тижня, 9. децембра, Школа шицких своїх интернатянох „почасцела” з єднодньовим вилєтом до Суботици, дзе нащивели Палич, тарґовищни центер и Крачунски и новорочни вашар. Школа тот вилєт плановала з Рочним планом Дому школярох, за цо обезпечела и пенєж.

ПОВЯЗАНИ ТЕКСТИ