РУСКИ КЕРЕСТУР – Екипа ТВ-емисиї „Граждан” Радио телевизиї Сербиї (РТС), хтора обрабя теми з живота националних меншинох у Сербиї, на чолє з новинарку Веру Раичевич вчера у канцелариї Националного совиту Руснацох и дописовательстве „Руского слова” у Руским Керестуре зняла прилоги о информованю на руским язику, з акцентом на нашей дньовей информативней аґенциї „Рутенпрес”.
О тим за РТС спред Националного совиту бешедовали предсидатель його Вивершного одбору Желько Ковач, предсидатель Одбору за информованє и новинар „Руского слова” Иван Сабадош, членїца Одбору за информованє и новинарка у вербаским локалним медию Еуфемия Ґшвенґ, та директорка „Руского слова” Мартица Тамаш, редактор „Рутенпресу” Михайло Зазуляк и новинарка Мария Афич.
Екипа зняла и кратшу анкету з читачами „Рутенпресу” и „Руского слова”, а емисия би мала буц емитована у своїм стандардним терминє – на вовторок, 23. юния на 11,35 годзин на Першей програми РТС.