ВОЙВОДИНА – Институт за явне здравє Войводини вчера сообщел же ше епидемиолоґийна ситуация у покраїни може охарактеризовац як барз чежка зоз тендецию дальшого погоршаня.
Хвильково у АП Войводини реґистровани 15.651 активни случаї инфекциї на ковид-19, а у шпитальох ше находза 1.335 особи.
Здравствени установи барз обтерховани зоз числом пациєнтох, а окреме чежка ситуация пре факт же 681 роботнїк у здравственей системи охорел од того вирусу.
Окреме чежка ситуация на териториї цалого Южнобанатского округу, як и у Сримскей Митровици, Зренянину, Кикинди, Суботици и Зомборе.
Найчежша ситуация у Новим Садзе пре вельо пациєнтох зоз барз чежку клинїчну слику и числом охорених хтори преходзи капацитети цо потераз хасновани у борби процив пандемиї.
Прето прешлого викенду за ковид-пациєнтох опредзелєни и Институт за плюцово хороти Войодини у Сримскей Каменїци, а за два днї пополнєти два трецини капацитету.
Прето Институт апелує на гражданох Войводини же би були одвичательни и же би ше строго притримовали препоручених епидемиолоґийних мирох.