БЕОҐРАД – Того року ше полня 15 роки од порушованя проєктох помоци за розвой Сербиї з Европскей униї (ЕУ) и дотераз ЕУ Сербиї з предприступних фондох доновала вецей як три милиярди еври безповратни средства.
– Од кеди у марцу 2001. року порушани перши проєкти, ЕУ постала найвекши партнер и донатор Сербиї. Од змоцньованя державней управи по образованє, здравствену и социялну защиту, вибудов мостох и драгох, защиту животного штредку и правох трошительох, ЕУ пошвецена помоци Сербиї у приступаню Униї през числени програми и проєкти хтори гражданом приноша и конкретни пременки – гварел шеф Делеґациї ЕУ у Сербиї Майкл Девенпорт.
У єдним з ключних периодох кед Сербиї була нєобходна помоц под час вельких вилївох 2014. року, держави членїци прейґ Механїзму ЕУ за цивилну защиту за 48 годзини послали екипи хтори помагали у ратованю людзох и випумпованю води зоз загрожених обєктох. Пошвидко ЕУ доновала и вецей як 173 милиони еври за обнову, наглашел Девенпорт.
По програми ИПА 2 предвидзене же Сербия од 2014. по 2020. рок достанє 1,5 милиярди еври, а средства наменєни за сектори хтори найзначнєйши за пририхтованє Сербиї за членство у ЕУ, а Девенпорт гварел же ше тераз у Сербиї запровадзує коло 600 проєкти ЕУ.
У рамикох означованя 15 рокох помоци Сербиї од ЕУ буду орґанизовани рижни збуваня, як цо то конференциї, вистави, презентациї успишних проєктох ЕУ, а отворени и фото-конкурс з тему „Дзе видзим ЕУ у Сербиї”.