ШИД – На вчерайшей конференциї за новинарох Деян Булатович, предсидатель Покраїнского одбору желєнєй еколоґийней партиї, чийо административне шедзиско у Шидзе, наявел же на ютре на 10 годзин почнє роботна акция на ушореню побрежя Босуту, од виходу з валалу ґу гранїци з Републику Горватску.
Орґанизовани превоз зоз Шиду на 9 годзин спред шедзиска странки у центре городу, а акцию потримує и Явне комуналне подприємство (ЯКП) „Стандард”.
Булатович додал же странка з помоцу Европскей униї обезпечела даскельо тисячи младнїки америцкей тополї, хтори посадзени у вецей городох Войводини.
По словох Милени Петко, задлуженей за желєнїдло у спомнутим ЯКП, Шид достал тисяч младнїки, хтори тих дньох буду посадзени у Шидзе, Бачинцох, Беркасове, Бинґули, Кукуовцох, Ердевику и у Вашици.