РУСКИ КЕРЕСТУР – Еколоґийни рух „Желєни персцень” з Руского Керестура вчера иницировал схадзку з представителями Явно-комуналного подприємства (ЯКП) „Руском”, на хторей бешедоване о обнавяню инициятиви за вибудов фабрики води у Керестуре, алє и о других потребох жительох и идейох, як цо то канализация, вибудов бициґлистичних дражкох, формованє фонду за воду за пице, етно-аґенциї, купелї (пре термални води), та централ-парку.
На схадзки у „Рускому” були члени Управного одбору „Желєного персценю”, на чолє з його предидательку др Леону Доротич Ґутеша, директор „Рускому” Иґор Фейди и руководитель продукцийно-фахового сектору того ЯКП Йоаким Надь.
Найвецей ше дискутовало о потреби за вибудову фабрики води, причинох прецо чежко идзе витворенє тей инвестициї, а заключене же шицки спомнути предкладаня Еколоґийного руху треба винєсц на шлїдуюцей схадзки Совиту Месней заєднїци, хтора би мала буц дальши порушовач тих идейох спрам висших орґанох власци и политичних структурох.
