Жени у борби за свойо права

автор апм
756 Опатрене

ВЕРБАС – Секция женох Ради Союзу самостойних синдикатох Сербиї (СССС) Вербас орґанизовала округли стол з тему „Положенє женох по одредбох Закона о роботи и Закона о пензиойно-инвалидским осиґураню (ПИО)”, же би ше през диялоґ дало потримовку кампанї „За достоїнствену роботу и заслужену пензию, сцеме нови Закони о роботи и ПИО”.

Даєдни з темох були потупйованє правох и обовязкох у безпечносци и здравю на роботи, анґажованє занятих прейґ аґенцийох, виплацованє минималних заробкох, почитованє колективного контракту и контракту о роботи, мобинґ, дискриминация и подобне.

Предсидателька Покраїнского одбору Секциї женох того синдикату Ґордана Милович винєсла дзепоєдни факти о положеню занятих женох, окреме визначуюци же аж два трецини женох заняти на одредзени час.

Як наявела предсидателька Секциї женох Ради вербаского СССС Стойка Дацич, заключеня з тей схадзки буду прешлїдзени до Секциї женох Ради Союзу самостойних синдикатох Войводини.

На схадзки присуствовали и шеф вербаскей филияли Националней служби за обезпечованє роботи Ґоран Калудєрович, предсидатель Општинскей ради СССС Вербас Ґоран Роґанович и Даринка Чулич з ПИО фонду.

ПОВЯЗАНИ ТЕКСТИ