Же би ше дзеци по руски учело и у Матки

автор саб
902 Опатрене

НОВИ САД – Представителє Националного совиту (НС) Руснацох вчера нащивели Подручну канцеларию (ПК) НС Руснацох у Новим Садзе, дзе з членми єй Координациї бешедовали о роботи  Канцелариї, односно Руского културного центру (РКЦ), хтори ношитель найвекшей часци орґанизованих активносцох Руснацох у Новим Садзе.

На сходзе у РКЦ були предсидатель Вивершного одбору НС Желько Ковач, предсидательки Одбору за културу Ґабриєла Саянкович и Одбору за образованє НС Мелания Римар, секретар НС Руснацох Таня Арва Планчак, котрим домашнї були директор РКЦ Владимир Сивч и цали состав Координациї новосадскей ПК, на чолє з координаторку Наташу Макаї Мудрох.

Тема стретнуца були актуална ситуация у витворйованю меншинских правох з обласцох у компетенциї Националного совиту, а найвецей бешедоване о образованю и култури, дзе найважнєйша терашня инициятива же би виборна настава по руски на основношколским уровню, попри у 12 городских школох, од септембра була орґанизована и у просторийох РКЦ.

2-PK-02

По словох члена НС Руснацох Миломира Шайтоша, у Координациї ПК задлуженого за културу, пре специфичну орґанизацию културних активносцох на подручу Городу Нови Сад, секциї РКЦ ше нє вше можу квалификовац за руски фестивали, та дакеди частейше наступаю у иножемстве як дома. Становиско представительох културного живота Руснацох у Новим Садзе же би прето требало кориґовац таблїчки и критериюми хтори тераз виключно одвитую валалским КУД. Окреме визначени континуитет у квалитету яки посцигую Драмски студио РКЦ и Хор „Гармония”.

Кед слово о информоваю по руски, член Координациї ПК задлужени за тоту обласц Славко Винаї гварел же активносци РКЦ углавним коректно попровадзени, а по догварки, евентуални проблеми у комуникациї би требало ришиц вєдно з Одбором за информованє НС Руснацох.

У обласци права на службене хаснованє язика и писма член ПК задлужени за тоту обласц Боґдан Рац поинформовал же ше то почитує и сполнює у правосудних институцийох, алє проблем же ше у городских и покраїнских институцийох, чийо шедзиско у Новим Садзе, гаши роботни места прекладательох, цо представя потупйованє здобутого права.

У членстве Координациї ПК НС Руснацох у Новим Садзе и Борис Фейди, задлужени за активносци младих и вчера представел вецей витворени и будуци проєкти хтори ше реализує у РКЦ, а наменєни су младшей популациї. Зауважел же потримовка хтору достали од Роботного цела за младеж НС нєдостаточна у одношеню на число младих Руснацох у Новим Садзе.

 2-PK-03

ПОВЯЗАНИ ТЕКСТИ