Зоз Службу Божу хтору предводзел апостолски нунций у Сербиї монс. Лучиано Суриани, зоз владиками медзи хторима бул и наш еґзарх кир Георгий Джуджар и зоз велїма священїками, монахинями и вирнима з рижних местох, 4. авґуста у Петроварадину на Текийох означени ювилей екуменского святилїща.
– Христос обявел свою славу на свадзби у Кани Галилейскей кед претворел воду до вина, а Мария направела нови крочай у вири кед присутним гварела: „Цо ґод вам пове, зробце”. Богородица и наша мац. Требали бизме жиц як вона, буц браца и шестри и благословиц єдни других – гварел апостолски нунций у Републики Сербиї монс. Лучиано Суриани, архиепископ, з нагоди означованя 300-рочнїци святилїща Мариї Текийскей у Петроварадину.
Источасно, того дня, монс. Суриани преславел и 35 роки як є рукоположени за священїка и було му окреме мило подзелїц радосц и тей подїї зоз вельочисленима вирнима зоз Сербиї и иножемства. На концу, вон благословел шицких присутних у мено папи Франциска.
Пред Богослуженьом отримана пригодна духовно-музична програма на хторей участвовали Ґрупа РиМ зоз Заґребу и Вокално-инструментални состав „Текиї” зоз Петроварадину.
ВЄДНО РИЖНИ ВИРИ, ЯЗИКИ И ОБИЧАЇ
У складзе з медзинародним и екуменским характером того святилїща хторе и памятнїк култури од окремного значеня, централна ювилейна преслава позберала у заєднїцтву вири, язики и обичаї подунайских народох чия прешлосц, терашньосц и будучносц нєрозлучно повязани зоз тим завитним Марийовим святилїщом.
У духу єдинства, Євангелия и молитви читани на язикох паломнїкох хтори участвовали у евхаристийним славеню, та так по церковнославянски читал парох новосадски о. Юлиян Рац, а молитви по руски дзияк Йовґен Надь.
– Господи Исусе Христе, прим прейґ заступнїцтва Мариї нашо щири молби. Най нашо животи буду обяви твойого милосердия – препоручене у молбох по руски.
Шветочне означованє ювилея закончене зоз литурґийну процесию и шпиваньом Богородици. Як гварене паломнїком, текийска завитна процесия означує и нашу животну драгу, а запалєни швички же зме порихтани шлїдзиц Господа Исуса Христа, хтори шетло швета, а и же и ми сцеме буц шветло.
Богослуженя були и 5. авґуста, на дзень Шнїговей Мариї, зоз побожносцу Крижней драги и Службами на нємецким, мадярским и горватским язику.
З нагоди ювилея, сримски владика монс. Дюро Ґашпарович 3. авґуста, под вонкашнїм олтаром церкви, отворел Музей Владического святилїща Мариї Текийскей, збирку составену од фотоґрафийох, погляднїцох и експонатох хтори шведоча о паломнїцтвох и вирско-завитней димензиї того святилїща на Текийох. Вистава хронолоґийно-тематского типа и од отвераня є доступна шицким хтори ю зосцу видзиц.
ДУХОВНА, УМЕТНЇЦКА И ИСТОРИЙНА ДИМЕНЗИЯ
Тиж, у атриюму Музея городу Нового Саду на Твердинї прешлого тижня едукативно представена велька битка коло 300 000 воякох, османлийох и християнох, 5. авґуста 1716. року, з ориґиналнима предметами, репродукциями вельких мапох зоз Бейчу, макету битки, оружийом, тедишнїм пенєжом и рижнимна звитами.
По словох автора пригодней вистави на Твердинї, историчара мр Синиши Йокича, так ше сцело же би була заступена и уметнїцка и историйна димензия презентациї тей значней подїї, зоз потримовку городских институцийох и Покраїни.
У програми преслави предвидзени и наукови сход у октобре и подобова вистава.
Орґанизаторе преслави Сримске владичество, Владическе святилїще Мариї Текийскей и нємецке здруженє „Донау”, чийо члени вєдно з хором участвовали на Служби на нємецким язику.
ПОДЗЕКОВАНЄ ЗА ВЕЛЬКУ ПОБИДУ
Пред 300 роками, после побиди над Турками при Петроварадину, принц Еуґен Савойски преведол войско на бачки бок и 8. авґуста отримал вельку шветочносц, молебен и подзекованє Богу и Богородици же му вислухани молитви, же виратовани Петроварадин (а з тим и Будим, Бейч и Европа) и победзене муслиманске войско Турскей.
У рамкох означованя трох викох од судьбоносней битки, на брегу Везирац прешлого тижня представнїки амбасадох державох хтори ше борели, положели венци шицким погинутим борцом. Присуствовали представнїки зоз Австриї, Мадярскей, Турскей, як и покраїнскей и городскей власци.
