МИКЛОШЕВЦИ – Прешлого пиятку, 16. октобра, у Миклошевцох отримани збор гражданох на хторим розпатрани вецей комунални питаня, а окремна розправа водзена о обрахунку и наплацованю за потрошену воду.
У валалє коло 140 обисца хасную воду з городского „Водоводу” Вуковар и пред штирома роками до шахтох покладзени автомати хтори одчитую кубикажу потрошеней води, так же роботнїк нє уходзи до обисца, алє воду одчитує з улїци.
Медзитим, тих дньох утвердзене же за прешли мешац пришло до гришкох у тим автоматским одчитованю, бо ше з одчитованьом у шахтох указало же скоро шицки трошителє у септембру потрошели вельо менєй води як одчитал инструмент и достали високи рахунки за воду, цо знємирело Миклошевчанох.
Попри векшого числа гражданох, на зборе присуствовали и началнїк Општини Томповци Томислав Паненич, його заменїки Здравко Звонарич и Мирослав Лїкар, та предсидатель Ради Месного одбору Миклошевци Дюра Бики.
По длугшей розправи заключене же делеґация з Миклошевцох, вєдно з началнїком Паненичом, нащиви дирекцию „Водоводу”, же би ше винашло одвитуюце ришенє за обидва боки.
