Завод за видаванє учебнїкох означує 50 роки роботи

автор мгк
989 Опатрене

НОВИ САД – У рамикох 25. Дньох Миколи М. Кочиша, 50-рочнїци снованя Заводу за видаванє учебнїкох и 50 рокох нєпреривного видаваня учебнїкох по руски, та 45-рочнїци снованя Дружтва за руски язик, литературу и културу (Дружтво), вчера, 4. децембра, представителє Дружтва нащивели новосадске Оддзелєнє Заводу за видаванє учебнїкох, дзе их прияла руководительки Оддзелєня др Романца Йованович.

На приєму у Заводзе були предсидатель Скупштини Дружтва др Юлиян Рамач, секретар Дружтва Ирина Папуґа, член Скупштини Дружтва Дюра Латяк и бувши редакторе за руски язик у Заводзе Славко Сабо и Мария Дудаш, як и терашня редакторка за руски язик Гелена Папуґа.

З нагоди спомнутих ювилейох, представителє Дружтва Заводу, односно руководительки новосадского Оддзелєня уручели и окремне подзекованє за сотруднїцтво, як и виданя Дружтва.

Дзекуюци на подзекованю и винчуюци ювилей Дружтву, др Романца Йованович виражела задовольство же Завод и Дружтво вше мали и тераз маю добре сотруднїцтво, а Славко Сабо присутних здогаднул же пред 50 роками почал робиц Покраїнски завод за видаванє учебнїкох, зоз задатком видавац учебнїки на язикох националних меншинох. На початку тей роботи у Розвойним оддзелєню бул Микола М. Кочиш.

– За тоти 50 роки у тей установи од окремней дружтвеней значносци видати коло 1 200 наслови (учебнїки) по руски, у тиражу вецей як 350 000 прикладнїки. На тих учебнїкох робели коло 80 авторе, вецей як 140 прекладателє и коло 50 други сотруднїки – рецензенти, лекторе, илустраторе, коректоре – гварел з тей нагоди  Славко Сабо.

SAMSUNG CAMERA PICTURES

ПОВЯЗАНИ ТЕКСТИ