Завод и Општина Кула подписали Протокол

автор зам
767 Опатрене

КУЛА – Директор Заводу за културу войводянских Руснацох (ВР) Серґей Тамаш и предсидатель Општини Кула Драґан Трифунович вчера, 19. октобра у Кули подписали Протокол о медзисобним сотруднїцтве у орґанизованю и отримованю Централней преслави националного швета Руснацох у Сербиї, хтора 16. януара 2016. року будзе у Кули.

З Протоколом одредзени обовязки обидвох бокох, а подписани є на основи скорейших догваркох и усмено датей потримовки Општини Кула за орґанизованє Централней преслави у Кули, цо тераз и службено верификоване.

Як Рутенпрес дознава од директора Заводу Серґея Тамаша, з Протоколом тераз утвердзене и же приєм за госцох и учашнїкох по Шветочней академиї будзе у просторийох Мадярского културного центру „Непкер” у Кули, понеже дотераз у опциї були вецей вариянти.

1-Protokol-02

На вчерайшим подписованю Протоколу присуствовали и предсидатель Вивершного одбору Националного совиту Руснацох Желько Ковач и предсидателька Скупштини општини Кула Снежана Мркаич.

Госци функционерох Општини упознали з уж утвердзену програму Централней преслави на Орґанизацийним одборе, а и на тот завод визначене же означованє националного швета Руснацох у Кули позбера вельке число госцох, представительох державних, покраїнских и локалних орґанох, госцох з иножемства, учашнїкох як и представительох установох, институцийох и здруженьох з рускей заєднїци у Сербиї.

Поведзене и же Завод за културу ВР главни орґанизатор и финансиєр Централней преслави нашого швета, а орґанизує ю окремни Орґанизацийни одбор. У складзе з дотерашню праксу о технїчней и другей потримовки локалней самоуправи дзе су отримовани, и з Општину Кула тераз подписани Протокол о сотруднїцтве.

ПОВЯЗАНИ ТЕКСТИ