Загрожени права новинарох и шлєбода медийох

автор бета/сен
1.3k Опатрене

БЕОҐРАД – Прешлого року шлєбода медийох було єдно з найзагроженших правох, уплїв власци на ушорйовацку политику вельки, а звекшане число нападох на новинарох – гварене вчера на представяню звиту Беоґрадского центру о людских правох.

– Уровень шлєбоди медийох у 2015. року бул на найвекших спокусох у тим вику. Преширени уплїв власци на ушорйовацку политику медийох, а широка таблоидизация, винїмково чежке економске положенє и каждодньове потупйованє професийних стандардох причина такому стану – гварел новинар Иван Протич.

Вон додал же людзе на власци и блїзки власци похопели приватизацию медийох як можлївосц уплїву на медиї прейґ приватнїка, та хаснованє пенєжу з проєктного софинансованя за пропаґандно-политични цилї.

У 2015. року зазначени 60 напади на новинарох, спомедзи хторих 32 физични, а нє ураховани кампанї хтори ше водзело процив дзепоєдних новинарох.

Були присутни числени проблеми у применьованю медийних законох пре нєдостаток дзеки политичарох, нєдоповедзеносц законох, та нєдефиновани надпатруюци механїзми и санкциї.

ПОВЯЗАНИ ТЕКСТИ