НОВИ САД – У Новим Садзе стреду, 7. децембра, отримана пригодна шветочносц з нагоди 170-рочнїци задруґарства у Войводини, хтору орґанизовал Задружни союз Войводини, а присуствовали на нїм и предсидатель Покраїнскей влади Иґор Мирович, покраїнски секретар за польопривреду, водопривреду и лєсарство Вук Радоєвич, та госци зоз Словениї, Горватскей и Босней и Герцеґовини.
Винчуюци ювилей, предсидатель Покраїнскей влади Иґор Мирович гварел же у идуцим року будзе виражена векша потримовка задруґарству и интензивней польопривреди понеже Покраїнска влада за польопривреду у буджету планує милиярду 370 милиони динари, цо скоро два раз вецей як того року. Мирович наглашел же тераз у Войводини активни 400 землєдїлски задруґи, за хтори вязани коло 100 000 особи и обрабяю вецей як трецину з вєдно 1,75 милиони гектари обрабяцей жеми у покраїни, цо потвердзує важносц задруґарства.
Покраїнски секретар за польопривреду, водопривреду и лєсарство Вук Радоєвич на шветочносци визначел же здружованє польопривреднїкох барз важне за їх обстоянє на тарґовищу, док предсидатель Задружного союзу Войводини Радислав Йованов гварел же задруґарство нєшка нє лєм красна традиция, алє є потреба и будучносц.
На означованю ювилею представена и моноґрафия „170 роки задруґарства у Войводини”, уручени ювилейни грамоти визначним задруґаром, а означена и 60-рочнїца виходзеня новинох за польопривреду и валал „Польопривреднїк”.