Закони о правох меншинох добри, проблем у їх запровадзованю

автор зам
951 Опатрене

БЕОҐРАД – Сербия ма добри законодавни рамики з хторима ше реґулує права националних меншинох, гварела подпредсидателька Влади Сербиї и министерка державней управи и локалней самоуправи Кори Удовички на вчерайшим округлим столє „Национални совити/меншински самоуправи у правней системи Републики Сербиї”, алє додала же єст проблеми у запровадзованю предписаньох, та дзепоєдни правни ришеня треба меняц пре лєпше применьованє.

Як гварела, Устав дава цалком добри рамик за лєпши закон о националних совитох (НС-ох) националних меншинох и же „на столє за дискусию може буц шицко цо у терашнїх уставних рамикох”.

Министерка Удовички наглашела же потребне витвориц право националних меншинох на културну автономию, же прешлого року прилапени Закон о националних совитох унапредзел виберанкову систему за совити, та прето у нїм нє отверани питаня компетенциї НС-ох, як и же намира обновиц Буджетски фонд за национални меншини, основани 2002. року. Министерка гварела же ше уж роби на прилапйованю подзаконского акту, як предусловия за таки способ финансованя. Додала же и попри найвекшей фискалней консолидациї, держава у тим року нє зменшала суми за финансованє НС-ох.

Бешедуюци о медийох Кори Удовички оценєла же у креированю явней политики национални совити муша мац важну совитодавну улогу, алє нє и же би постали продукователє мистох, лєбо же би тримали монопол над ушорйованьом. Гварела и же ше тераз муши уходзиц нови способ финансованя програмох у информованю на язикох меншинох.

Тот 2015. рок означел и интензивни диялоґ Влади Сербиї и НС-ох националних меншинох, а Удовички виражела наздаванє же явна дискусия о Акцийним планє за моцнєнє положеня националних меншинох (як часц Акцийного плану за отверанє Поглавя 23 у прегваркох з ЕУ), принєше потребну методолоґию, алє же то чежко будзе витворене у идуцим року. Но, як гварела, будзе шицко пририхтане же би у будучносци була цо лєпша заступеносц меншинох було дзе, та и у явней управи.

Шеф Мисиї ОЕБС-а у Сербиї Петер Буркгард оценєл же Сербия ма напредни правни рамики за защиту националних меншинох, насампредз прейґ националних совитох, алє потребне применьованє законох. Же зоз законами проблем у пракси, на округлим столє заключел и жеф першого сектору операцийох Делеґациї ЕУ у Сербиї Николас Бизел, наглашуюци же ЕУ поважно провадзи розвой на тим планє.

Сход орґанизовани пре унапредзенє нормативних рамикох з хторима ше утвердзує права националних меншинох, а часц є активносци предвидзеней з Акцийним планом за Поглавє 23 у прегваркох з ЕУ, хторе ше одноши на людски права. Спред НС Руснацох на округлим столє присуствовал заменїк предсидателя Совиту Йовґен Мудри.

ПОВЯЗАНИ ТЕКСТИ