КОЦУР – Активносци у Дзецинским тижню у коцурскей Основней школи „Братство єдинство” и коцурским Оддзелєню „Герлїчка” ПУ „Бошко Буха” з Вербасу були числени, алє пре подлу хвилю, даєдни з нїх и нє отримани.
Дзецински тидзень у коцурскей школи почал з нащиву Оддзелєню Ґеронтолоґийного центру у Коцуре. Вовторок и штварток були креативни роботнї, на хторих дзеци з природних материялох правели пахняци платново мещки, змагали ше у правеню чардакох з чуткох, лєбо правели малюнки животиньох зоз вшелїяких зарнох.
Стреду бул спортски дзень, у рамикох хторого було и змаганє у штафетних бавискох, а вчера школяре мали еко-маскенбал и єдни другим писали писма приятельства. Старши школяре, од пиятей по осму класу мали спортски змаганя и зоз школярами з других школох, а крос хтори бул заплановани за стреду, мушел буц преложени.
Рапухи у дзецинскей заградки отримали креативну роботню з родичами, нащивели коцурских огньогасцох, Етно-клуб „Одняте од забуца”, як и Читальню. Єден дзень рисовали по асфалту, а цали тидзень тирвала гуманитарна акция „Дзеци-дзецом”, та родичи приношели шмати, бависка, школски прибор и подобне за дзеци котрим то потребне.