КУЛА – После коло полрочней роботи на єй ушореню, вчера, 19. децембра, за транспорт знова пущена Крамерова улїца у центре Кули, хтора цалком реконструована, так же, попри вельо красшого випатрунку, у центре Кули знова нормализовани транспорт.
Роботи на преправяню Крамеровей улїци тирвали од юлия того року, а вредносц роботох коло 60 милиони динари. Пенєж за оправянє центру Кули обезпечени з буджету Општини Кула и самодоприносу гражданох Кули.
Реконструовану Крамерову улїцу вчера обишол и предсидатель Општини Кула Перица Видеканїч зоз сотруднїками, котри з тей нагоди гварел же и у идуцим року у кулскей општини будзе предлужене витворйованє капиталних инфраструктурних проєктох, а плановане и цалосне ушоренє парку у центре Кули, праве у Крамеровей улїци, як и вибдов нового будинку Дому здравя, хтори поконцу парку.
Крамерова улїца забранєна за терховни превозки, а пре плановане звекшанє числа пешакох, максимална швидкосц за авта у нєй огранїчена на 30 километри.
