НОВИ САД – Пондзелок, 13. юния, у новосадским Доме школярох штреднїх школох „Бранково коло” наставнїца Ванеса Медєши отримала закончуюцу годзину зоз школярами котри у тим школским року у Новим Садзе ходзели на виучованє руского язика на штреднїм ступню образованя.
Виучованє руского язика, литератури и култури за школярох котри у Новим Садзе ходза до штреднїх школох почало 2007. року, з тижньовим фондом од два годзини. У тим школским року отримани 53 годзини руского язика у Технїчней школи „Милева Марич Айнштайн” и у интернату „Бранково коло“.
На закончуюцей годзини у „Бранковим колу” школяре читали состави хтори писали през рок и бешедовали о своїх упечаткох вязаних за наставу хтору слухали. Шицки наглашели же и у идуцим школским року предлужа з виучованьом руского язика.
Медзи штредньошколцами котри виучовали руски язик припознанє „Славка Сабадош“ Дружтва за руски язик, литературу и културу (Дружтво) достала Теодора Кермеци з Кули, школярка штвартей класи Медицинскей школи „7. април”.
Школяре на концу школского рока достали и младежски часопис „Мак“ НВУ „Руске слово”, та Зборнїк роботох „Студия Рутеника” и други виданя Дружтва, хтори им уручела секретар Дружтва Ирина Папуґа.
Закончуюца годзина за школярох котри на руски язик ходза до Технїчней школи „Милева Марич Айнштайн” будзе отримана на соботу, 18. юния, на 9 годзин.